عسى بفستاها أشواكـ ،، وفي ثوبه عقارب سود

**أصدآف** · 11-15-2009, 09:39 AM

ثلاث سنين وانا اخطط لهذا اليوم يابو سعود
تيسر حالي وجاهز اوفي وعدي بوقته

وفجأة جتني تتعذر .. تقول تأخرت الوعود
وانا مستغرب واسمع كأني وعدها خنته !!

حسبت انها تمازحني وتتصنع جفا وصدود
ضحكت بوجهها من قلب .. مع انها بايخة النكته

وقالت ارضى بالواقع .. قلبي ماهو المعهود
تغير كل شي صوبك .. نصيبي مااظن انته !!

كنت في يوم محبوبي ولكن مااظن نعود
وصل من قبل ماتوصل .. وانا ذاك الصبر عفته

ولكن تكفى صدقني ويشهد ربي المعبود
ترى ماخنتك بغفلة .. ولا كلمتة ولاشفته

صراحة اهلي قالوا لي بأنه ولد اصل وجود
وجتني امه بالصورة .. وبكلمات المدح اخته

سكت وقلت هي فرصة مدام الجود في الموجود
وقالوا كل من حولي علامات الرضا سكته

وانا فكرت مدام امه واخته ماعليهم زود
اكيد انا براضيهم اذا وافقت واخترته

واراضي اهلي واخواني مدام الفرح مقصود
عطيت الناس انا كلمة ومعاهم وقتي حددته

ولااقدر اغيرها .. تراها عند العرب منقود
اوافق واعتذر باجر واقول الراي غيرته !

تبي تشرح لي المنقود .. تصدق عاد يابو سعود
تبيني اقتنع وارضى بحال عمري ماعشته

انا ماني بقايلها .. عسى يفرش ثراها ورود
بعد ماحطمت قلبي وطعم الموت جربته

عسى بفستانها اشواك .. وفي ثوبه عقارب سود
ونار تحرق الكوشة وتحرق بيتهم حتى

علي اهون اذا ماتوا ولا بنفس السرير رقود
ترى صعب علي اتخيل اللي عمري ماتخيلته

عسى قاع الثرى يقسى ويتحول صخر جلمود
وحفار القبر يرفض يسوي فوق مقدرته

ترى دفنة عديم الذات تلوع حتى كبد الدود
ومن خان العهود ومات تعافه حتى مقبرته

انا ماني حقود وشين ولاني من نسل نمرود
ومن حط نفسه بوضعي يقول اللي انا قلته

مدام الفعل له ردة فعل والله ابشري بردود
بدعي دامني حي وبغرس للدعا نبته

وبسقيها نزيف القلب ودمع مارحم الخدود
وتكبر والثمر ثاري من اللي خانني وصنته

انا نذر علي اكتب وافجر هالقصيد رعود
واسمع كل بشر صوتي رضيته ولا زعلته

واردد للي يسمعني .. اذا حبيت (حط حدود )
انا حبيت دون حدود وشوف اللي تكبدته

ثلاث سنين انا ابني وجت صورة بكل برود
خذت مني شقى عمري وحلم قلت حققته !!!

ثلاث سنين انا اخطط لهذا اليوم يابوسعود
وتوافق من كلام اخته وصورة (6x4)

منقوله لعيونكم

ان شالله تعجبكم
بصراحه من أروع القصآئد اللي قريتهآ وسمعتهآ

للتحميل

//

\\

**هــاويــ جــدة** · 11-15-2009, 06:43 PM

الله عليك
صح لسان شاعرها وماننحرم من ذوق ناقلها

دمتِ بكل ود وحبه ودام لنا الله قلمك ابداع وتميز

تحياتي ودي لك

**أصدآف** · 11-15-2009, 07:37 PM

منور اخوي ربي يعطيك العافيه

الموضوع: عسى بفستاها أشواكـ ،، وفي ثوبه عقارب سود